ABŞ Prezidenti Donald Tramp Fransanın dövlət başçısı Emmanuel Makronun Parisdə "Böyük Yeddilik" (G7) ölkələrinin iştirakı ilə görüş keçirmək təklifini qəbul etməyib.
"Operativ Məlumat Mərkəzi-OMM" xəbər verir ki, Ağ Evdə keçirilən mətbuat konfransı zamanı Tramp bu səfərin baş tutmayacağını qəti şəkildə bildirib.
O, qərarını Fransadakı siyasi vəziyyət və Makronun hakimiyyət müddəti ilə əlaqələndirib:
"Xeyr, mən oraya getməyəcəyəm. Çünki Emmanuel orada uzun müddət qalmayacaq və orada sabitlik yoxdur", - deyə Tramp qeyd edib.
ABŞ lideri həmçinin əlavə edib ki, Makronla şəxsi dostluq münasibətləri olsa da, o, prosesə birbaşa cəlb olunmuş şəxslərlə görüşməyə üstünlük verir.
Xatırladaq ki, Emmanuel Makron yanvarın 22-də Parisdə G7 ölkələrinin görüşünü təşkil etməyi, həmçinin bu tədbirə Rusiya və Ukraynanı da dəvət etməyi təklif etmişdi.
