ABŞ Prezidenti Donald Tramp İranla bağlı Vaşinqtonun mövqeyinə dair sərt açıqlamalar verib.
“Operativ Məlumat Mərkəzi – OMM” xəbər verir ki, Tramp bu barədə jurnalistlərin suallarını cavablandırarkən danışıb.
Məlumata görə, Tramp İranın danışıqlar zamanı ABŞ-yə dəfələrlə yalan danışdığını iddia edib. O, Tehrana heç bir etimadının olmadığını vurğulayıb.
“İranla bağlı danışıqlara etibar etmirəm. Niyə mənə elə sual verirsiniz ki, sanki İrana güvənirəm? İrana güvənəcək ən son adam mənəm. Onlar mənə daim yalan danışıblar”, – deyə Tramp bildirib.
Tramp Hörmüz boğazı ilə bağlı da iddialı açıqlama verib. O, boğazın hazırda tamamilə ABŞ Hərbi Dəniz Qüvvələrinin nəzarətində olduğunu iddia edib.
“Hazırda Hörmüz boğazı üzərində tam nəzarət bizdədir. Nəzarət onlarda deyil, tam nəzarət bizdədir. Ora bizimdir”, – deyə ABŞ Prezidenti qeyd edib.
Bundan əlavə, Tramp NATO sammitindən sonra Türkiyədən ayrılarkən təhlükəsizlik səbəbilə fərqli təyyarədən istifadə etməsi ilə bağlı məlumatı da təsdiqləyib.
O bildirib ki, qərar ABŞ Məxfi Xidmətinin tələbi əsasında qəbul edilib və özü təhlükəsizlik qüvvələrinin göstərişlərinə əməl edib.
“Məndən fərqli təyyarə ilə uçmağımı istədilər, bu da təhlükəsizlik baxımından ekvivalent bir seçim idi”, – deyə Tramp vurğulayıb.
Siyasətçi ona qarşı çoxsaylı təhdidlərin olduğunu da bildirib. Onun sözlərinə görə, təhlükəsizlik əməkdaşları hansı qərarın qəbul edilməsini istəyirlərsə, o da həmin göstərişlərə əməl edir.
“Görünür, bir təhdid var idi. Bu barədə çox sual vermədim. Çox sayda təhdid alıram”, – deyə Tramp əlavə edib.
