Tokayev Xəzər bölgəsində hərbi qüvvələrdən istifadəni istisna etməyə çağırıb
“Operativ Məlumat Mərkəzi-OMM” xəbər verir ki, bu barədə Qazaxıstan Prezidenti Kasım-Jomart Tokayev çıxışında bildirib.
Bildirilib ki, Tokayev Astanada keçirilən ilk Regional Ətraf Mühit Sammitində Xəzər dənizinin qorunmasının region üçün strateji əhəmiyyət daşıdığını vurğulayıb.
Prezident qeyd edib ki, Xəzər bölgəsində silahlı qüvvələrin istifadəsi istisna edilməli və qadağan olunmalıdır.
“Xəzər bölgəsində silahlı qüvvələrin hər hansı istifadəsi istisna edilməli və qadağan edilməlidir”, – deyə Tokayev bildirib.
O əlavə edib ki, Xəzər dənizi regionun ekoloji tarazlığı, biomüxtəlifliyi və davamlı inkişafı üçün mühüm əhəmiyyət daşıyır və onun qorunması beynəlxalq əməkdaşlıq tələb edir.
Qeyd olunub ki, Qazaxıstan Xəzər dənizində ekoloji vəziyyətin yaxşılaşdırılması məqsədilə dövlətlərarası proqramlar həyata keçirir və elmi əməkdaşlığı gücləndirmək üçün xüsusi institut yaradıb.
Sammitdə Mərkəzi Asiya ölkələri, Avropa İttifaqı, ŞƏT və Yaxın Şərqdən nümayəndələrin iştirak etdiyi bildirilir.
