Bakıda taksilərin xüsusi hərəkət zolaqlarından istifadə etməsinə hələlik icazə verilməsi planlaşdırılmır.
"Operativ Məlumat Mərkəzi-OMM" xəbər verir ki, bu barədə Rəqəmsal İnkişaf və Nəqliyyat Nazirliyinin müavini Rəhman Hümmətov açıqlama verib.
O, bunu “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nın 2025-ci il üzrə icrasına həsr olunan dəyirmi masa zamanı bildirib.
R.Hümmətov qeyd edib ki, paytaxtda taksilərin sayı 25 mindən çoxdur və reallıqda bu rəqəm daha yüksəkdir:
“Bu qədər nəqliyyat vasitəsinin xüsusi hərəkət zolaqlarına daxil olması zolaqların əsas funksiyasını zəiflədə bilər. Taksilər zolaqlarda dayanaraq sərnişin götürəcək və endirəcək, bu isə hərəkətin maneəsizliyini pozur və zolaqların effektivliyini azaldır”.
Nazir müavini əlavə edib ki, hazırda əsas prioritet mövcud zolaqların yalnız ictimai nəqliyyat üçün sürətli və fasiləsiz hərəkətini təmin etməkdir:
“Buna görə də taksilərin xüsusi zolaqlardan istifadəsi məsələsi hazırkı mərhələdə gündəmə gətirilmir”.
