Rusiya Federasiyasının Xarici Kəşfiyyat Xidməti ("SVR") çərşənbə axşamı yaydığı bəyanatda Böyük Britaniya və Fransanı Ukraynanı nüvə silahı ilə təmin etmək üçün fəal iş aparmaqda ittiham edib.
"Operativ Məlumat Mərkəzi-OMM" xəbər verir ki, Rusiya kəşfiyyatının iddiasına görə, London və Paris Kiyevin atom silahına, yaxud ən azı "çirkli bomba"ya sahib olacağı təqdirdə Moskva ilə münaqişəni daha əlverişli şərtlərlə sonlandıra biləcəyinə inanır.
Məlumata görə, Avropa dövlətləri hazırda bu növ silahların və onların çatdırılma sistemlərinin tədarükü məsələlərini nəzərdən keçirir.
İttihamlar həm London, həm də Paris tərəfindən dərhal və qətiyyətlə rədd edilib. Böyük Britaniyanın dövlət naziri Stiven Dauti bu iddiaları "açıq yalan" və diqqəti münaqişədən yayındırmaq üçün növbəti dezinformasiya cəhdi adlandırıb.
O, ölkəsinin Nüvə Silahlarının Yayılmaması haqqında Müqaviləyə (NPT) tam sadiq qaldığını vurğulayıb.
Fransanın BMT-dəki daimi nümayəndəsi Jerom Bonnafon da ittihamları kəskin tənqid edərək, onların heç bir faktiki əsası olmadığını bildirib. O qeyd edib ki, Fransa məsuliyyətli tərəf kimi beynəlxalq öhdəliklərini heç vaxt pozmayacaq.
Rusiya tərəfi həmçinin Almaniyanın bu təhlükəli macərada iştirakdan imtina etdiyini bildirib.
Hadisə ilə bağlı Rusiya Federasiya Şurası beynəlxalq təşkilatları və müvafiq ölkələrin qanunvericilərini araşdırma aparmağa çağırıb.
