Afət Ziyadqızı
Böyük Britaniya hökuməti Rusiyaya qarşı tətbiq etdiyi sanksiyaların əhatə dairəsini genişləndirib.
“Operativ Məlumat Mərkəzi-OMM” xəbər verir ki, Britaniya hökumətinin rəsmi saytında yayılan məlumata əsasən, yeni məhdudiyyətlər 10 Rusiya vətəndaşına şamil edilib.
Bildirilib ki, sanksiyaların tətbiqinə səbəb kimi həmin şəxslərin “Rybar LLC” media şirkətinin fəaliyyəti ilə əlaqəli olmaları göstərilib. Britaniya hakimiyyətinin mövqeyinə görə, sözügedən şəxslər Ukraynadakı vəziyyətin sabitliyinin pozulmasına yönəlmiş fəaliyyətlərdə iştirak etməkdə, həmçinin Ukraynanın ərazi bütövlüyü, suverenliyi və müstəqilliyinə təhdid yaratmaqda ittiham olunurlar.
Qeyd edək ki, London bundan əvvəl də yeddi Rusiya vətəndaşına qarşı sanksiyalar tətbiq etmişdi. Həmin şəxslər Rusiyanın kimyəvi silah proqramı və “Noviçok” zəhərləyici maddəsinin hazırlanması ilə bağlı fəaliyyətlərdə iştirakda günahlandırılmışdı.
Bununla belə, Britaniya tərəfi irəli sürdüyü ittihamlarla bağlı ictimaiyyətə konkret sübutlar təqdim etməyib.
