Afət Ziyadqızı
Suriya Prezidenti Əhməd əş-Şaraa Suriya Demokratik Qüvvələrinin lideri Məzlum Abdini özünə müşavir təyin edib.
“Operativ Məlumat Mərkəzi – OMM” xəbər verir ki, “SANA” agentliyinin yaydığı məlumata əsasən, Əhməd əş-Şaraa bununla bağlı fərman imzalayıb.
Sənəddə Məzlum Abdi kimi tanınan Mustafa Xəlil Abdinin Suriya Prezidentinin müşaviri vəzifəsini icra edəcəyi qeyd olunub.
Təyinat tərəflər arasında bir neçə aydır davam edən danışıqların nəticəsi kimi qiymətləndirilir. Məzlum Abdi avqustun 25-də rəhbərlik etdiyi silahlı dəstələrin buraxıldığını və kürd hərbi və inzibati strukturlarının Suriyanın dövlət institutlarına tam inteqrasiya edildiyini açıqlamışdı.
Bu addım Suriyada daxili gərginliyin azaldılması və mərkəzi hakimiyyətin ölkə ərazisində nəzarətinin bərpası istiqamətində mühüm mərhələ hesab olunur.
