Suriya Prezidenti Əhməd əl-Şaraa ilə ABŞ Prezidenti Donald Tramp arasında telefon danışığı olub.
“Operativ Məlumat Mərkəzi-OMM” xəbər verir ki, bu barədə SANA agentliyi məlumat yayıb.
Danışıq zamanı tərəflər Suriya-ABŞ ikitərəfli münasibətlərini, eləcə də regionda və beynəlxalq arenada baş verən son hadisələri müzakirə ediblər.
Əhməd əl-Şaraa Suriyanın yenidən qurulması mərhələsində ölkəyə beynəlxalq dəstəyin davam etdirilməsinin vacibliyini vurğulayıb. O bildirib ki, qalan sanksiyaların aradan qaldırılması ölkə iqtisadiyyatının bərpası və əhalinin həyat şəraitinin yaxşılaşdırılması üçün mühüm addım ola bilər.
Suriya liderinin sözlərinə görə, sanksiyaların ləğvi investisiya mühitini yaxşılaşdıracaq və iqtisadi layihələrin həyata keçirilməsi üçün daha əlverişli şərait yaradacaq.
Tərəflər həmçinin regional təhlükəsizlik və gərginliklərdən irəli gələn problemləri də müzakirə ediblər. Əl-Şaraa böhranların həlli üçün diplomatik yanaşma və dialoqun vacibliyini qeyd edib.
ABŞ Prezidenti Donald Tramp isə regionda sabitliyin qorunmasının və Suriyanın yenidən qurulması səylərinin dəstəklənməsinin əhəmiyyətini vurğulayıb.
Sonda tərəflər qarşılıqlı maraq doğuran məsələlər üzrə əlaqələrin və koordinasiyanın davam etdirilməsi barədə razılığa gəliblər.
