Ağdərə rayonunun Suqovuşan kəndi ərazisində piyada əleyhinə mina partlayışı baş verib.
“Operativ Məlumat Mərkəzi-OMM” xəbər verir ki, vətəndaş Məhərrəmov Mahir Abdulla oğlu qulançar yığan zaman minaya düşərək xəsarət alıb.
Daxili İşlər Nazirliyi, Baş Prokurorluq və Minatəmizləmə Agentliyinin (ANAMA) Mətbuat Xidmətlərinin yaydığı məlumata görə, 1982-ci il təvəllüdlü Ağdərə rayonunun Hacıqərvənd kənd sakini Məhərrəmov Mahir Abdulla oğlu keçmiş təmas xəttində, minalardan təmizlənməmiş ərazidə baş verən partlayış nəticəsində sağ ayağından xəsarət alıb. Faktla bağlı Tərtər rayon prokurorluğunda araşdırma aparılır.
Hər üç qurum bir daha vətəndaşları təhlükəsizlik qaydalarına riayət etməyə, mina təhlükəsi işarələrinin göstəricilərinə diqqətlə yanaşmağa, bələd olmadıqları ərazilərə daxil olmamağa və çəpərləmə fəaliyyəti aparılan ərazilərə müdaxilə etməməyə çağırıb. Qeyd edək ki, İkinci Qarabağ müharibəsindən sonra mina çirklənməsi səbəbindən ümumilikdə 421 azərbaycanlı mina qurbanı olub, onlardan 72 nəfər həlak olub.
