ABŞ ordusu İran limanlarına gedən 31 gəmini geri qaytarıb
"Operativ Məlumat Mərkəzi-OMM" xəbər verir ki, bu barədə ABŞ Mərkəzi Komandanlığı (CENTCOM) məlumat yayıb.
Bildirilib ki, İranın dəniz blokadasının başlanğıcından etibarən ABŞ ordusu İran limanlarına gedən və ya ölkə sahillərindən çıxmağa çalışan 31 gəmini istiqamətləndirib.
CENTCOM-un açıqlamasında qeyd olunub: “ABŞ qüvvələri İrana qarşı blokadanın bir hissəsi olaraq 31 gəmiyə geri dönməyi və ya limana qayıtmağı əmr edib”.
Məlumata görə, ABŞ və İsrail 28 fevral tarixində İrana qarşı hərbi əməliyyatlara başlayıb. Aprelin 7-də ABŞ Prezidenti Donald Tramp İslam Respublikası ilə iki həftəlik qarşılıqlı atəşkəs elan edib.
Qeyd olunub ki, İran tərəfinin hesablamalarına əsasən, müharibənin 40 günü ərzində ABŞ və İsrailin hücumları nəticəsində 3375 iranlı həlak olub.
Bildirilib ki, aprelin 11-də Tehran və Vaşinqton İslamabadda danışıqlar aparsa da, tərəflər mövcud fikir ayrılıqlarına görə uzunmüddətli razılığa gələ bilməyiblər.
Həmçinin qeyd edilib ki, aprelin 21-də ABŞ Prezidenti İranla atəşkəs rejimini uzatmaq niyyətində olduğunu açıqlayıb. İran dövlət televiziyasının məlumatına görə isə Tehran Vaşinqtonun birtərəfli atəşkəsini tanımaq niyyətində deyil və öz maraqlarına uyğun hərəkət edəcək.
Məlumata əsasən, İranın BMT-dəki daimi nümayəndəsi Əmir Səid İrəvani aprelin 22-də bildirib ki, ABŞ-nin dəniz blokadasını ləğv edəcəyi təqdirdə Tehran Pakistanda Vaşinqtonla danışıqların bərpasına açıqdır.
