Cənubi Koreya prokurorluğu ölkənin sabiq prezidenti Yun Sok Yol üçün ən ağır cəzanın – ölüm hökmünün tətbiq edilməsini tələb edib.
"Operativ Məlumat Mərkəzi-OMM" xəbər verir ki, bu barədə "Yonhap" agentliyi məlumat yayıb.
İyunun 25-də keçirilən apellyasiya məhkəməsində xüsusi prokurorlar qrupu sabiq prezidentin hərəkətlərini qiyam təşkil etmək kimi qiymətləndirib.
İttiham tərəfi aşağı instansiya məhkəməsinin daha əvvəl çıxardığı hökmün kifayət qədər sərt olmadığını əsas gətirərək, Yun Sok Yol üçün ölüm cəzası istəyib.
Prokurorluq hesab edir ki, 2024-cü ildə uğursuzluqla nəticələnən hərbi vəziyyət cəhdi dövlət quruluşuna qarşı ciddi cinayətdir.
Xatırladaq ki, 2024-cü il dekabrın 3-də Yun Sok Yol ölkədə hərbi vəziyyət elan etmişdi.
O, bu qərarını "KXDR" tərəfdarlarına qarşı mübarizə zərurəti ilə əsaslandırmışdı.
Lakin bu addım geniş etirazlara səbəb olmuş və qısa müddət sonra o, prezidentlik vəzifəsindən kənarlaşdırılmışdı.
