Cənubi Koreya məhkəməsi ölkənin keçmiş prezidenti Yun Sok Yol barəsində hökm çıxarıb.
“Operativ Məlumat Mərkəzi-OMM” xəbər verir ki, məhkəmənin qərarına əsasən, eks-prezident 2024-cü ilin dekabrında fövqəladə hərbi vəziyyət elan edərək qiyamın təşkilinə rəhbərlik etməkdə təqsirli bilinib.
İttiham aktına görə, Yun Sok Yol keçmiş müdafiə naziri və digər şəxslərlə əlbir olaraq, ölkədə müharibə və ya buna bərabər tutulan fövqəladə vəziyyət olmadığı halda hərbi rejim tətbiq etməkdə ittiham olunub.
Məhkəmə qeyd edib ki, bu addım ölkə Konstitusiyasının pozulmasına və dövlət quruluşunun sarsıdılmasına yönəlib.
Yol bununla da ömürlük həbs cəzasına məhkum edilib.
Xatırladaq ki, 2024-cü il dekabrın 3-də Yun Sok Yol gözlənilmədən hərbi vəziyyət elan edərək ordu və polis qüvvələrini səfərbər etmişdi.
Parlamentin səsverməsindən sonra prezident hərbi vəziyyəti ləğv etməyə məcbur olub. Qısa müddət sonra Milli Assambleya onun impiçmenti barədə qərar qəbul edib.
