OMM Redaksiyası
Türkiyə Futbol Federasiyası (TFF) Sergen Yalçınla 4 illik müqavilə imzalayıb. Rivadakı Hasan Doğan Milli Komandalar Təlim və Təhsil Mərkəzində keçirilən mərasimdə TFF-nin prezidenti İbrahim Hacıosmanoğlu, federasiyanın idarə heyətinin üzvləri və dəvətlilər iştirak ediblər.
Hacıosmanoğlu əvvəlki baş məşqçi Vinçentso Montellaya milli komandaya verdiyi töhfələrə görə təşəkkür edib. O, Türkiyə millisinin beş ildən sonra yenidən türkiyəli məşqçiyə tapşırıldığını bildirib və Yalçının futbol biliyini, təcrübəsini və liderlik keyfiyyətlərini vurğulayıb. Prezidentə görə, federasiyanın məqsədi davamlı uğur qazanan və beynəlxalq arenada söz sahibi olan komanda qurmaqdır.
Yalçın: Hamıya ehtiyacımız var
Yalçın vəzifənin karyerasının ən önəmlisi olduğunu deyib. O, milli komandanın qapısının hər kəsə açıq olacağını, heyətin ədalətli seçimlə formalaşdırılacağını və birlik hissini gücləndirmək istədiklərini söyləyib. Məşqçi “çox gözəl günlərin” onları gözlədiyini bildirib.
Yalçın Berke Özerin milli komandaya qayıtmaq istədiyini, futbolçularla aradakı problemin həll edilə biləcəyini qeyd edib. Türkiyənin seçmə mərhələdə qarşıda iki oyunu olduğunu, nəticələrdən asılı olaraq pley-offa çıxa biləcəyini deyib.
Baş məşqçi müqavilənin müddətinin 2028-ci il Avropa çempionatı və FIFA-nın 2030-cu il dünya çempionatı hədəfləri nəzərə alınaraq müəyyənləşdirildiyini bildirib. O, futbolçu və məşqçi kimi müxtəlif təcrübələr qazandığını, böyük klublarda kuboklar və çempionluq yaşadığını, əsas məqsədin nəticə əldə etmək olduğunu vurğulayıb. Mərasim kollektiv foto çəkilişi ilə başa çatıb.
