OMM Redaksiyası
ABŞ Prezidenti Donald Trampın Hörmüz boğazını blokadaya almaqla bağlı təhdidi İran Hərbi Dəniz Qüvvələrinin komandanı Şəhram İrani tərəfindən "absurd və gülünc" adlandırılıb.
“Operativ Məlumat Mərkəzi-OMM”-in məlumatına görə, bu barədə İran mediası xəbər yayıb.
Komandanın sözlərinə görə, İran Hərbi Dəniz Qüvvələrinin hərbçiləri ABŞ Silahlı Qüvvələrinin regiondakı bütün hərəkətlərini diqqətlə izləyir və tam nəzarətdə saxlayır.
Xatırladaq ki, ABŞ və İsrail fevralın 28-də İrana qarşı hərbi əməliyyatlara başlayıb. Nəticədə İranın ali rəhbəri ayətullah Əli Xamenei və bir sıra yüksək vəzifəli şəxslər öldürülüb. Buna cavab olaraq İran; İsrail, Səudiyyə Ərəbistanı, Qətər, Birləşmiş Ərəb Əmirlikləri, Oman, Bəhreyn, İraq və Kiprdə yerləşən ABŞ və müttəfiqlərinin hərbi bazalarına zərbələr endirib.
Gərginliyin ardınca İran, ABŞ və onların müttəfiqləri 2026-cı il aprelin 8-nə keçən gecə iki həftəlik atəşkəs barədə razılığa gəliblər. Daha sonra, aprelin 11-12-də Pakistanın vasitəçiliyi ilə İslamabadda tərəflər arasında rəsmi danışıqlar aparılıb.
