Bakı şəhərinin Yasamal rayonu, Moskva prospektinin "Şamaxinka" adlanan yol sahəsində nəqliyyatın hərəkət təşkilində mühüm dəyişikliklər edilir.
Bu barədə "Operativ Məlumat Mərkəzi-OMM" Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinə (AYNA) istinadən məlumat yayıb.
İcra olunan layihəyə əsasən, Asif Məhərrəmov küçəsindən gələn nəqliyyat vasitələri sola – 20 Yanvar küçəsi istiqamətində dönərkən əvvəlki trayektoriya ilə hərəkət etməyəcək. Sürücülər artıq həmin küçənin paralel hissəsi vasitəsilə Moskva prospektinə çıxış əldə edəcəklər.
Əlavə olaraq, 4-cü mikrorayondan Moskva prospekti istiqamətində gələn avtomobillərin hərəkəti də köhnə qaydada deyil, yeni təsdiqlənmiş sxem üzrə təmin olunacaq.
Asif Məhərrəmov küçəsinin əks istiqaməti ilə hərəkət edən nəqliyyat vasitələri xüsusi təhlükəsizlik adacığı ilə ayrılmış zolaq vasitəsilə 20 Yanvar küçəsinin paralel hissəsinə yönləndiriləcək. Bu kəsişmədə sürücülər həm 4-cü mikrorayon istiqamətində, həm də düzünə hərəkətlərini davam etdirə biləcəklər.
Yeniliyə əsasən, Moskva prospektinin 20 Yanvar küçəsi ilə kəsişmələrində, eləcə də yaxınlıqdakı geriyədönmə yerində hərəkət növbəliliyi işıqfor vasitəsilə tənzimlənəcək.
