Afət Ziyadqızı
Rusiya Federasiyası Müdafiə Nazirliyi oktyabrın 13-nə keçən gecə Ukrayna ərazisində yerləşən hərbi-sənaye kompleksinin (HSK) strateji müəssisələrinə, loqistika mərkəzlərinə, habelə dəmir yolu və dəniz portu infrastrukturlarına qarşı kütləvi zərbələr endirildiyini açıqlayıb.
"Operativ Məlumat Mərkəzi-OMM" xəbər verir ki, Rusiya hərbi idarəsinin rəsmi bəyanatına görə, hücumlar uzaqmənzilli yüksək dəqiqlikli yerüstü silahlar və kamikadze tipli pilotsuz uçuş aparatları (PUA) vasitəsilə həyata keçirilib.
Moskva rəsmiləri Kiyev şəhərində raket texnikası və uzaqmənzilli PUA-ların istehsalı təşkil olunan “Pulp Mill Print” poliqrafiya-sənaye müəssisəsinin hərbi təyinatlı sexinin hədəfə alınaraq vurulduğunu iddia edirlər.
Açıqlamada, həmçinin Ukrayna paytaxtında hərbi və ikili təyinatlı yüklərin daşınmasında istifadə olunan qatarların təmiri və bərpası ilə məşğul olan “Darniça” lokomotiv deposunun infrastruktura ciddi ziyan dəydiyi bildirilib.
Bəyanatda Nikolayev vilayətinin Ternovka yaşayış məntəqəsində Ukrayna Silahlı Qüvvələrinin maddi-texniki təminatı üçün nəzərdə tutulan və ikili təyinatlı malların saxlandığı “Nova Poçta” operatoruna aid loqistika terminalının, Meşkovo-Poqorelovo qəsəbəsində isə PUA anbarının sıradan çıxarıldığı qeyd olunub.
Rusiya Müdafiə Nazirliyi, eyni zamanda Buq limanında Nikolayev liman kompleksinə hərbi təyinatlı yüklər daşıdığı iddia edilən xarici quru yük gəmisinin zərbəyə məruz qaldığını elan edib.
Məlumatda Rusiya tərəfinin bu iddialarına qarşı Ukrayna rəsmi makamlarının və ya Müdafiə Qüvvələrinin mövqeyinə yer verilməyib.
