OMM Redaksiyası
“Roma”nın hücumçusu Paulo Dibala və müdafiəçisi Naul Molina Argentina millisinin Beninə qarşı keçirəcəyi matçda iştirak etməyəcək. Qarşılaşma Lionel Messinin Argentina yığmasının heyətində vida oyunu olacaq.
“Roma”nın yaydığı açıqlamaya görə, futbolçular oktyabrın 6-da Argentinada təşkil olunacaq tədbirdə yer almayacaqlar. Klub Dibala və Molinanın Lionel Messi ilə dostluq münasibətlərini, həmçinin 2022-ci ildə dünya çempionatında qazandıqları birgə qələbəni nəzərə aldığını bildirib.
Qərarın idman və logistika amilləri ilə bağlı olduğu qeyd edilib. Söhbət qitələrarası uçuşun uzunluğundan və qarşıdakı rəsmi matçların yaxın tarixdə keçirilməsindən gedir.
“Roma” açıqlamasında Lionel Messiyə və onun karyerasına böyük hörmət bəslədiyini, həmçinin ona və Argentina Futbol Assosiasiyasına uğurlu axşam arzuladığını bildirib.
Argentina–Benin matçı oktyabrın 6-dan 7-nə keçən gecə, Bakı vaxtı ilə saat 03:00-da başlayacaq. “Roma”nın növbəti rəsmi oyunu isə oktyabrın 11-də səfərdə “Komo”ya qarşı keçiriləcək.
