Afət Ziyadqızı
ABŞ-nin vitse-prezidenti J.D. Vens qarşıdan gələn Konqres seçkilərinin Respublikaçılar Partiyası üçün çətin keçəcəyini bildirib.
“Operativ Məlumat Mərkəzi-OMM” xəbər verir ki, bu barədə "Armenpress" məlumat yayıb.
O, fikirlərini “Fox News” telekanalına verdiyi müsahibə zamanı səsləndirib.
“Aralıq seçkilər həmişə hakimiyyətdə olan partiya üçün çox çətin olur. Tarixə baxsaq, hətta ölkədə vəziyyət yaxşı olsa belə, aralıq seçkilər çox vaxt hakim partiya üçün mənfi nəticələnir”, – deyə Vance qeyd edib.
Məlumata görə, ABŞ-də növbəti aralıq Konqres seçkiləri 2026-cı il noyabrın 3-də keçiriləcək.
Analitiklər Respublikaçıların Nümayəndələr Palatasında çoxluğu itirə biləcəyini proqnozlaşdırırlar. Ekspertlər bunun səbəblərini administrasiyanın reytinqinin enməsi, qiymət artımları və xarici siyasət, xüsusilə İrana qarşı hərbi əməliyyatlarla bağlı narazılıqlarla əlaqələndirirlər.
“New York Times” və Siena Kolleci Tədqiqat İnstitutunun birgə keçirdiyi sorğunun nəticələrinə əsasən, ABŞ cəmiyyətində siyasi sistemə qarşı narazılıq da artmaqdadır.
Sorğuda iştirak edənlərin 43 faizi ölkədəki hər iki əsas siyasi partiyadan narazı olduqlarını bildirib. Narazı seçicilərin 80 faizi ABŞ-nin iqtisadi və siyasi sisteminin ciddi dəyişikliklərə ehtiyac duyduğunu və ya tamamilə yenidən qurulmalı olduğunu düşünür.
Respondentlərin 70 faizdən çoxu ölkənin iqtisadi sistemini ədalətsiz hesab etdiyini qeyd edib.
