Dələduzluq və vəzifə səlahiyyətlərindən sui-istifadəyə görə beynəlxalq axtarışa verilən məktəb direktoru Türkiyədən Azərbaycana ekstradisiya edilib.
Bu barədə “Operativ Məlumat Mərkəzi-OMM”-ə Baş Prokurorluğun mətbuat xidmətindən məlumat verilib.
Məlumata görə, Bakı şəhərinin Suraxanı rayon prokurorluğunda aparılan cinayət işi üzrə məktəb direktoru vəzifəsində işləyən Hüseynova Sevinc Əlisəfa qızının qulluq mövqeyindən istifadə edərək bir neçə şəxsin ümumilikdə 69 min manat pulunu ələ keçirməsinə əsaslı şübhələr müəyyən edilib. O, istintaqdan yayındığı üçün barəsində beynəlxalq axtarış elan olunmuşdu.
"Ekstradisiya haqqında" 13 dekabr 1957-ci il tarixli Konvensiyanın tələblərinə əsasən, Baş Prokurorluğun vəsatəti Türkiyə Respublikasının səlahiyyətli orqanları tərəfindən təmin edilib. Keçirilmiş əməliyyat-axtarış tədbirləri nəticəsində Türkiyə ərazisində saxlanılan Sevinc Hüseynovanın Azərbaycana gətirilməsi istiqamətində Ədliyyə Nazirliyinin Penitensiar Xidməti tərəfindən müvafiq tədbirlər görülür.
