OMM Redaksiyası
“Zirə” Misli Premyer Liqasının VII turunda “Şamaxı” ilə 1:1 hesablı heç-heçə edib. Matçdan sonra baş məşqçi Rəşad Sadıqov qarşılaşmanın ağır keçdiyini və komandanın qol imkanlarından yararlana bilmədiyini bildirib.
“Birinci hissə bizim üçün yaxşı keçdi, amma əlverişli epizodlardan istifadə edə bilmədik. Rəqib uzaq məsafədən zərbə ilə qol vurdu. Hesabı bərabərləşdirdik, yaxşı hücumlarımız oldu, təəssüf ki, ikinci qolu vura bilmədik. Belə çətinliklər yaşadığımız dövrdə bir xal qazanmaq da asan deyildi”, – Sadıqov deyib.
Heyətdə zədə problemləri
Məşqçinin sözlərinə görə, bir neçə futbolçu zədə və xəstəlik səbəbindən komandanın hazırlıq prosesindən kənarda qalıb. İssa Cibrilla milli komandada zədələnib, Quima da zədə alıb, Giorgi Papunaşvili isə iki həftə qızdırma səbəbindən məşq edə bilməyib. Sadıqov sıx oyun qrafikinin problemlərə təsir göstərmiş ola biləcəyini qeyd edib.
“Papunaşvili cəmi bir məşq keçmişdi. Eren Aydın da elə. Leqbo üçün isə bu, zədədən sonrakı ilk oyun idi. Futbolçu çatışmazlığına görə oyun sistemini dəyişməyə və fərqli variantlar axtarmağa məcburuq”, – baş məşqçi bildirib.
Sadıqov İssa Cibrillanın təxminən iki-üç həftə komandadan ayrı qalacağını deyib. O, hazırda heyətdə səkkiz-doqquz zədəli futbolçunun olduğunu vurğulayıb. Baş məşqçi qapıçı Anar Nəzirovun bu mövsüm üçüncü qapıçı olduğunu və digər qapıçılara kömək etdiyini də açıqlayıb.
Sadıqov keçmiş qapıçı Tyaqo Silvanın “Şəfa”ya keçidi barədə danışaraq onun komandada qalmasını istədiklərini, yeni klubunda isə uğurlar arzuladığını bildirib.
