BMT-nin baş katibi Antonio Quterreş ABŞ və İran arasında tam atəşkəsin əldə olunmasına və Hörmüz boğazında gəmiçiliyin bərpasına çağırıb.
"Operativ Məlumat Mərkəzi-OMM" xəbər verir ki, bu barədə o, “X” sosial şəbəkəsində paylaşım edib.
Quterreş bildirib ki, Hörmüz boğazı və ətrafında naviqasiya hüquq və azadlıqlarının məhdudlaşdırılması qlobal miqyasda ciddi çətinliklər və qeyri-sabitlik yaradır.
“Dünyanın tam atəşkəsə və beynəlxalq hüquqa uyğun olaraq naviqasiya hüquq və azadlıqlarının bərpasına ehtiyacı var”, – deyə BMT baş katibi qeyd edib.
O, həmçinin vurğulayıb ki, ən yaxşı ssenaridə belə Hörmüz boğazının bağlanmasının nəticələri yaxın aylarda özünü göstərəcək və inkişaf etməkdə olan ölkələr daha çox zərər görəcək.
Daha əvvəl İran Silahlı Qüvvələrinin Xatəm əl-Ənbiya Mərkəzi Qərargahı ABŞ-ın mümkün zərbələri fonunda Hörmüz boğazından keçən gəmiçiliyin tam dayandırıldığını açıqlamışdı. İslam İnqilabı Keşikçiləri Korpusu (SEPAH) isə boğazdan keçməyə cəhd edən ən azı iki gəminin hədəfə alındığını bildirmişdi.
