Qazaxıstanın keçmiş Hərbi Dəniz Qüvvələri komandanı saxlanılıb

Qazaxıstanın keçmiş Hərbi Dəniz Qüvvələri komandanı Kanat Niyazbekov saxlanılıb. O, sentyabrda Xəzər dənizində keçirilən hərbi təlimlər zamanı 14 hərbçinin həlak olması ilə əlaqədar vəzifə borcunu səhlənkarlıqla yerinə yetirməkdə ittiham olunur.

“TASS” hüquq-mühafizə orqanlarına istinadən Niyazbekovun həbs edildiyini xəbər verib. “Qazinform” isə ölkənin Daxili İşlər Nazirliyinə istinadla onun saxlanıldığını yazıb.

Qazaxıstan Prezidenti Kasım-Jomart Tokayev hadisəyə görə Niyazbekovu oktyabrın 3-də vəzifəsindən azad edib. Sentyabrın 24-də əlverişsiz hava şəraitində patrul katerindən düşən 19 hərbçi dənizə aparılıb, onların bir hissəsi xilas edilib.

Hadisədən bir gün sonra Müdafiə Nazirliyinin beş vəzifəli şəxsi, o cümlədən Hərbi Dəniz Qüvvələri komandanının birinci müavini Daniyar Xayruşev saxlanılıb. Daxili İşlər Nazirliyi onların səhlənkarlıqda və naviqasiya qaydalarını pozmaqda şübhəli bilindiyini açıqlayıb.

“Xazar Qorgany 2026” adlı dəniz təlimləri sentyabrın 22-də Xəzər dənizinin Qazaxıstana aid hissəsində başlayıb. Təlimlərdə 500-dən çox hərbçi iştirak edib.

Tokayev Müdafiə Nazirliyində hərtərəfli yoxlama aparılmasını tapşırıb və milli matəm günü elan edib. O, hadisənin səbəblərinin və təlimlərin keçirilməsi qərarının əsaslarının müəyyənləşdirilməsini istəyib. Baş nazir Oljas Bektenov hərbçilərin ölümü ilə bağlı araşdırma aparmaq üçün hökumət komissiyasının yaradılmasını tapşırıb.

Müdafiə naziri Dauren Kosanov sentyabrın 27-də vəzifəsindən azad edilib. Müdafiə nazirinin birinci müavini Kanyş Abubakirov və Baş Qərargah rəisi Almaz Cumakeyev də oktyabrın 3-də vəzifələrindən kənarlaşdırılıblar.