Afət Ziyadqızı
Rusiya Prezidenti Vladimir Putin Moskvada keçirilən Valday Müzakirə Klubunun iclasında çıxış edərək Avropa ölkələrinə hücum etmək planlarının olmadığını bəyan edib. Bununla belə, Rusiya lideri Qərbin mümkün təcavüzünə cavab verməyə hazır olduqlarını vurğulayıb və NATO üzvü Polşa ilə Litva arasında yerləşən eksklavı Kalininqrad vilayəti ilə bağlı xəbərdarlıq edib.
"Operativ Məlumat Mərkəzi-OMM" xəbər verir ki, Putinin bu bəyanatı NATO-nun regionda çəkindiricilik tədbirlərini gücləndirmək məqsədilə keçirdiyi hərbi təlimlərdən sonraya təsadüf edir.
Moskva NATO-nun Kalininqradı hava və ya dəniz yolu ilə blokadaya almaq cəhdlərinə kəskin cavab veriləcəyini bildirib. Putin vurğulayıb ki, Kalininqrada və ya digər Rusiya ərazilərinə birbaşa hücum olacağı təqdirdə, Moskva hərbi arsenalındakı bütün vasitələrdən istifadə etmək məcburiyyətində qalacaq.
Ukraynadakı müharibənin gedişatına və iqtisadi təsirlərinə toxunan Putin Ukrayna PUA-larının Rusiya neft emalı zavodlarına və infrastrukturuna endirdiyi zərbələrin ölkə iqtisadiyyatına müəyyən zərər vurduğunu etiraf edib. O, bu zərərin ümumi daxili məhsulun (ÜDM) təxminən 1 faizi həcmində qiymətləndirildiyini və Qara dənizdəki hərbi əməliyyatlarda 100-dən çox Rusiya gəmisinin sıradan çıxarıldığını bildirib.
Eyni zamanda, Rusiyanın hərbi xərclərini kəskin artırmağı planlaşdırdığı məlum olub. Məlumata görə, Moskvanın 2027-ci ildə müdafiə xərclərini 27 faiz artıraraq 17,1 trilyon rubla çatdırması nəzərdə tutulur ki, bu da münaqişənin başlanmasından bəri rekord göstərici sayılır.
