Afət Ziyadqızı
ABŞ müdafiə naziri Pit Heqset NATO müdafiə nazirlərinin görüşünü başa çatdırmadan tərk edib və Ukraynaya silah tədarükü üzrə Təmas Qrupunun iclasında iştirak etməyəcək.
“Operativ Məlumat Mərkəzi-OMM” xəbər verir ki, bunu NATO-nun baş katibi Mark Rutte iclasdan sonra keçirilən mətbuat konfransında bildirib.
Rutte qeyd edib ki, Heqset görüşdə müzakirələrin əsas hissəsində iştirak edib, lakin əvvəlcədən müəyyən edilmiş qrafikinə görə iclası erkən tərk etməli olub.
“Nazir Heqset səhər saat 9:30-da gəlib və təxminən saat 11:15-də gedib. Bu o deməkdir ki, o, müzakirənin əksər hissəsində, təxminən iki saat ərzində iştirak edib. Biz əvvəlcədən bilirdik ki, o, qrafiki ilə əlaqədar daha tez getməli olacaq”, - deyə Rutte bildirib.
Məlumata görə, Ukrayna üzrə Təmas Qrupunun iclası Brüsseldə saat 15:00-da başlayacaq.
Rutte daha əvvəl Ukrayna Prezidenti Volodimir Zelenskini görüşdə iştirak etməyə dəvət etdiyini açıqlamışdı.
