OMM Redaksiyası
Ermənistanın baş naziri Nikol Paşinyan İrəvanın balanslaşdırılmış xarici siyasət çərçivəsində Rusiya ilə əlaqələri dərinləşdirmək və Avropa İttifaqı ilə tərəfdaşlığı gücləndirmək istədiyini açıqlayıb.
İrəvanın Rusiya siyasəti
Paşinyan bildirib ki, Ermənistan xarici əlaqələrini şaxələndirir və bunu “balanslaşdırılmış siyasət” kimi qiymətləndirir. Onun sözlərinə görə, Ermənistanla Rusiya arasındakı münasibətlər Azərbaycan və Ermənistan arasında sülhün əldə olunmasından sonra dəyişir.
Baş nazir qeyd edib ki, əvvəlki dövrdə Ermənistan-Rusiya əlaqələrinin təxminən 90 faizi təhlükəsizlik məsələlərinə əsaslanırdı. O, İrəvanın Rusiya ilə münasibətləri konstruktiv şəkildə dəyişdirmək və dərinləşdirmək niyyətində olduğunu vurğulayıb.
“Biz konstruktiv mövqedəyik. Rusiya Federasiyası ilə münasibətlərimizi konstruktiv şəkildə dəyişdirmək və dərinləşdirmək istəyirik. Rusiya ilə dostluq və qardaşlıq münasibətlərimizi də möhkəmləndirmək niyyətindəyik”, – Paşinyan deyib.
Avropa İttifaqı ilə əməkdaşlıq
Paşinyan Nyu-Yorkda Avropa Komissiyasının prezidenti Ursula fon der Lyayenlə də görüşərək Ermənistan-Avropa İttifaqı əməkdaşlığını müzakirə edib.
Ermənistan hökumətinin başçısı ölkənin iqtisadiyyatının şaxələndirilməsi və demokratik islahatların həyata keçirilməsi üçün Avropa İttifaqının dəstəyinin əhəmiyyətini vurğulayıb.
Ursula fon der Lyayen isə Avropa İttifaqının Ermənistan hökumətinin proqramlarını dəstəkləməyə davam edəcəyini və müxtəlif sahələrdə əməkdaşlığı genişləndirəcəyini bildirib. Görüşdə regional məsələlər də müzakirə olunub.
