Pakistanda polis kompleksinə hücumda ölənlərin sayı 31-ə çatıb

Pakistanda polis kompleksinə həyata keçirilən intiharçı hücum nəticəsində ölənlərin sayı 31-ə çatıb. Bu barədə AFP polis rəsmisinə istinadən məlumat yayıb.

Hadisə cümə günü Hayber-Paxtunxva əyalətinin Kohat rayonunda yerləşən “Old Police Lines” kompleksində baş verib. Partlayıcılarla yüklənmiş avtomobil polis obyektinin giriş qapısına çırpılıb.

Hücum zamanı polis əməkdaşları və onların ailə üzvləri məsciddə namaz qılırdılar. Partlayış nəticəsində kompleksin ərazisindəki məscidin qarşısında çuxur yaranıb.

Polisin məlumatına görə, hadisə zamanı altı “terrorçu”, o cümlədən intiharçı da öldürülüb. Hayber-Paxtunxva polisinin rəhbəri bildirib ki, atışma zamanı Xüsusi Bölmənin polis binasında daha bir intihar partlayışı baş verib.

Əfqanıstan Xarici İşlər Nazirliyinin sözçüsü Əbdül Qahar Balkhi hücumu “X” sosial şəbəkəsində kəskin şəkildə pisləyib. O, müqəddəs məkanlara hücumları “əsassız və qəbuledilməz” adlandıraraq, həlak olanların ailələrinə başsağlığı verib.

Bundan başqa, Pakistanın təhlükəsizlik qüvvələri ölkənin cənub-qərbindəki Bəlucistan əyalətində keçirilən iki əməliyyat zamanı yeddi silahlını öldürüb.