OMM Redaksiyası
Nigeriyanın Niger ştatının paytaxtı Minna şəhərindəki saxlanma mərkəzində 37 nəfər ölüb. Sağ qalan şəxslərin sözlərinə görə, mühafizəçilər həddindən artıq dolu kameraya naməlum maddə püskürdüb və məhbuslar nəfəs almaqda çətinlik çəkərkən qapıları bağlı saxlayıblar.
Hadisə etirazlara səbəb olub. Nigeriya Prezidenti Bola Ahmed Tinubu araşdırma aparılması barədə göstəriş verib. Nigeriya Təhlükəsizlik və Mülki Müdafiə Korpusunun (NSCDC) bir neçə yüksəkvəzifəli əməkdaşı araşdırmanın nəticələri açıqlanana qədər vəzifəsindən uzaqlaşdırılıb.
Saxlanılan şəxslər kimlər olub?
Ölənlərin əksəriyyətinin qanunsuz mədən işlərində, xüsusilə kustar qızıl mədənlərində çalışan yeniyetmələr və gənc kişilər olduğu bildirilir. Onlar qanunsuz mədənçilik fəaliyyəti ilə bağlı reydlər zamanı saxlanılıblar.
22 yaşlı Adamu İsah bildirib ki, sentyabrın 17-də təxminən 5 kvadratmetr sahəsi olan kameraya əvvəlcə 17 nəfər yerləşdirilib, daha sonra isə oraya təxminən 50 nəfər gətirilib. Saxlanılan şəxslər sıxlıqdan şikayət etdikdən sonra əməkdaşların qapının altından naməlum maddə püskürtdüyü iddia olunur.
İsahın sözlərinə görə, təxminən bir saat sonra kameradakı şəxslər qəribə davranmağa, huşlarını itirməyə və ölməyə başlayıblar. Digər sağ qalan Dauda Şehu maddənin “ətirə bənzər qoxusu” olduğunu deyib. Onun sözlərinə görə, bir neçə saat sonra məhbusların boğazı qaşınmağa başlayıb və onlar nəfəs almaqda çətinlik çəkiblər.
Ölüm səbəbi hələ müəyyənləşdirilməyib
Üçüncü sağ qalan şəxs də Nigeriya televiziyasına oxşar açıqlama verərək, saxlanılanların darısqal şəraitdən dəfələrlə şikayət etdiyini və daha sonra içəriyə “istiot qoxusuna” bənzər maddə püskürdüldüyünü bildirib.
NSCDC əvvəlcə ölümlərin xəstəlik ocağı ilə əlaqəli ola biləcəyini açıqlayıb. Daha sonra isə ölüm səbəbinin məlum olmadığını və araşdırılacağını bildirib.
Qurbanların bir çoxu İslam ənənəsinə uyğun olaraq qısa müddət ərzində dəfn edilib. Altı şəxsin cəsədi Niger Ştatı Ümumi Xəstəxanasında saxlanılır.
Etirazlar zamanı bir nəfər ölüb
Ölümlərlə bağlı keçirilən etiraz aksiyaları cümə günü toqquşmalarla nəticələnib. Toqquşmalar zamanı bir nəfər ölüb. Bundan sonra hakimiyyət orqanları 24 saatlıq komendant saatı tətbiq edib.
