Afət Ziyadqızı
Nepalda güclü sel nəticəsində ölənlərin sayı 469 nəfərə yüksəlib.
“Operativ Məlumat Mərkəzi – OMM” xəbər verir ki, “Trishuli” bölgəsində baş verən təbii fəlakət nəticəsində yollar palçıq qatı ilə örtülüb, çoxsaylı avtomobillər yararsız vəziyyətə düşüb.
Yerli hakimiyyət orqanları hadisəni 2015-ci ildə baş verən dağıdıcı zəlzələdən sonra ölkənin üzləşdiyi ən ağır təbii fəlakət kimi qiymətləndirirlər.
Mütəxəssislərin ilkin rəyinə görə, selin qəfil baş verməsinə buzlaqların çökməsi səbəb ola bilər. Təhlükəli ərazilər təhlükəsizlik qüvvələri tərəfindən barikatlarla bağlanıb.
Bölgədə helikopterlərin dəstəyi ilə genişmiqyaslı xilasetmə əməliyyatları davam etdirilir. “Trishuli”dəki tunellərdən birində köməksiz vəziyyətdə qalan 450 nəfərin böyük hissəsinin təxliyə edildiyi bildirilir.
Milli Fəlakət Riskinin Azaldılması və İdarə Edilməsi Qurumunun məlumatına görə, fəlakət nəticəsində 80 körpü dağılıb, 40 kilometrlik asfalt yol yararsız hala düşüb. Dağıntılar mart ayında vəzifəyə başlayan Baş nazir Balendra Shah hökuməti üçün də ciddi problemlər yaradıb.
Çin sərhədi yaxınlığında baş verən hadisə Nepalın ikinci ən böyük ticarət tərəfdaşı ilə mal dövriyyəsinin dayanmasına səbəb olub. İdxaldan asılı olan ölkə iqtisadiyyatı üçün tədarük zəncirində yaranan fasilənin ciddi iqtisadi yük yaradacağı gözlənilir.
Çinin “Şinhua” xəbər agentliyi isə Tibet bölgəsində mahsur qalan 555 turistin təxliyə edildiyini açıqlayıb. Hindistan, Avstraliya və ABŞ rəsmiləri də fəlakət bölgəsində vətəndaşlarının itkin düşdüyünü bildirərək, axtarış-xilasetmə tədbirlərini diqqətdə saxlayırlar.
