ABŞ-nin İrana qarşı planlaşdırdığı hava əməliyyatlarının genişləndirilməsi hərbi resurs çatışmazlığı səbəbindən çətinləşə bilər.
“Operativ Məlumat Mərkəzi-OMM” xəbər verir ki, bu barədə “The Washington Post” qəzetinə danışan yüksək rütbəli ABŞ rəsmisi məlumat verib.
Mənbənin sözlərinə görə, ABŞ ordusunun hava hücumundan müdafiə sistemləri və uzaqmənzilli sursat ehtiyatları azalır. Bu isə planlaşdırılan hərbi əməliyyatların əvvəlcədən nəzərdə tutulduğu miqyasda davam etdirilməsini çətinləşdirir.
Bildirilib ki, regionda davam edən hərbi qarşıdurmalar nəticəsində yaranan itkilər ABŞ-nin Yaxın Şərqə əlavə canlı qüvvə və döyüş təyyarələri göndərmək imkanlarını da məhdudlaşdırıb.
Adının açıqlanmasını istəməyən rəsmi şəxs bildirib: “Əməliyyatları təhlükəsiz şəkildə həyata keçirmək üçün kifayət qədər resursumuz yoxdur və hesab edirəm ki, Ağ Ev bunun miqyasını tam dərk etmir.”
Qeyd edək ki, bundan əvvəl İsrail mətbuatında ABŞ-nin Yaxın Şərqə əlavə yanacaqdolduran təyyarələr və döyüş təyyarələri göndərdiyi barədə məlumatlar yayılmışdı.
Həmçinin bildirilirdi ki, tərəflər arasında gərginliyin azaldılması məqsədilə 14 iyun tarixində “İslamabad Mutabakatı” imzalanıb və 60 günlük danışıqlar prosesi nəzərdə tutulub. Lakin iyulun 8-də ABŞ-nin İrana qarşı yeni hücumları və Tehranın cavab olaraq regiondakı ABŞ hərbi bazalarını hədəf aldığını açıqlaması fonunda vəziyyət yenidən gərginləşib.
