Afət Ziyadqızı
ABŞ-nin müdafiə naziri Pit Heqset Yaxın Şərqdəki Amerika hərbi kontingentinin dislokasiya müddətini uzadıb.
"Operativ Məlumat Mərkəzi-OMM" xəbər verir ki, bu barədə "The Wall Street Journal" (WSJ) məlumat yayıb.
Bildirilib ki, altı ay əvvəl İrana qarşı kampaniyaya başlayan ABŞ rəhbərliyi qısa və qətiyyətli zərbələrlə münaqişənin uzunmüddətli xarakter almasının qarşısını almağı hədəfləyib. Lakin son qərar müharibənin gələn ilə qədər uzana biləcəyinə dair ehtimalları artırıb.
Mənbələrin məlumatına görə, hərbi dislokasiya müddətinin uzadılması prezident Donald Trampa geniş manevr imkanı verən "müddətsiz hərbi strategiya"nın bir hissəsidir.
ABŞ Prezidentinin köməkçiləri ilə keçirdiyi qapalı müzakirələrdə müharibənin başa çatdığını elan etmək ideyasını dəstəklədiyi bildirilir.
Bununla yanaşı, Tramp hesab edir ki, İrana qarşı davam edən iqtisadi təzyiqlər rəsmi Tehranın qarşısında iki seçim qoyacaq: nüvə proqramını dayandırmaq və ya tamamilə geri çəkilmək.
"The New York Times" qəzeti isə daha əvvəl Trampın qələbə ilə bağlı bəyanatlarına baxmayaraq, nəzarət edə bilmədiyi bir münaqişənin içində qaldığını yazıb.
