Naxçıvanda həyata keçirilən əməliyyat zamanı İrandan Türkiyəyə gedən yük maşınında xüsusi üsulla gizlədilmiş 41 kiloqramdan artıq maye metamfetamin aşkar olunub.
"Operativ Məlumat Mərkəzi-OMM" xəbər verir ki, Naxçıvan Baş Gömrük İdarəsinin əməkdaşları tərəfindən həyata keçirilmiş tədbirlər nəticəsində xüsusilə külli miqdarda psixotrop maddə qanunsuz dövriyyədən çıxarılıb.
Azərbaycandan tranzit keçməklə hərəkət edən yük nəqliyyat vasitəsi "Şahtaxtı" gömrük postunda yoxlamaya cəlb edilib.
Yoxlama zamanı nəqliyyat vasitəsinə aid qoşquda kustar üsulla hazırlanmış xüsusi saxlanc yeri müəyyən edilib. Həmin yerdən 20 ədəd plastik qabda maye halında, təmiz çəkisi 41 kiloqram 600 qram olan xüsusilə külli miqdarda psixotrop maddə - metamfetamin tapılıb.
Faktla bağlı araşdırma aparılır.
