Sabiq milli təhlükəsizlik naziri, Azərbaycanın Özbəkistandakı keçmiş səfiri Namiq Abbasov vəfat edib.

"Operativ Məlumat Mərkəzi-OMM" xəbər verir ki, N.Abbasov bu gün 84 yaşında dünyasını dəyişib.

Qeyd edək ki, Namiq Abbasov 1940-cı ildə Ordubad şəhərində anadan olub.

N.Abbasov 1995-ci ilin mart ayından 2004-cü ilin iyul ayınadək Azərbaycanın milli təhlükəsizlik naziri vəzifəsində işləyib, general-polkovnik hərbi rütbəsinə qədər yüksəlib.

Nazir postundan azad edildikdən sonra 2004-cü ilin 16 dekabr tarixindən 2012-ci il oktyabrın 31-nə kimi Azərbaycanın Özbəkistan Respublikasında fövqəladə və səlahiyyətli səfiri postunda çalışıb. Səfir vəzifəsini tərk etdikdən sonra təqaüdə çıxıb.

Prezident İlham Əliyev Türk İnvestisiya Fondunun Rəhbərlər Şurasında Azərbaycanın təmsil edilməsi ilə bağlı bəzi məsələlər haqqında sərəncam imzalayıb.

"Operativ Məlumat Mərkəzi-OMM" xəbər verir ki, sərəncama əsasən, Türk İnvestisiya Fondunun Rəhbərlər Şurasında Azərbaycandan Rəhbər iqtisadiyyat naziri (Mikayıl Cabbarov), alternativ Rəhbər isə maliyyə naziri (Samir Şərifov) təyin edilib.

Onlara həmin Fondda Azərbaycanı təmsil etmək səlahiyyəti verilib.

Prezident İlham Əliyev sahibkarlıq fəaliyyəti sahəsində fərqlənən şəxslərin “Tərəqqi” medalı ilə təltif edilməsi haqqında Sərəncam imzalayıb.

"Operativ Məlumat Mərkəzi-OMM"-in məlumatına görə, onlar Azərbaycan Respublikasının iqtisadi inkişafına verdikləri töhfəyə və sahibkarlıq sahəsində səmərəli fəaliyyətlərinə görə mükafatlandırılıblar.

Abdullayeva İlhamə Xanlar qızı

Abuşov İlkin Əlimövsüm oğlu

Ağazadə İlqar Bəhruz oğlu

Bədəlov Mustafa Soltan oğlu

Cavanşir Elman Bəşir oğlu

Əhmədova Afət Adil qızı

Hacıyev Sultanhəmid Hacı oğlu

Hüseynov Yaşar Mirzəxan oğlu

İsmixanlı Ramin Sultan oğlu

Məmmədov Emin Ruslan oğlu

Məmmədov Fuad Nadir oğlu

Məmmədov Seymur Mikayıl oğlu

Rzayev Emin Əjdər oğlu

Tabasaranskiy Kənan Fikrət oğlu.

Qaçqınların və Məcburi Köçkünlərin İşləri üzrə Dövlət Komitəsində Laçın rayonunun Sus kəndinə köçürüləcək ailələr arasında püşkatma keçirilib.

"Operativ Məlumat Mərkəzi-OMM" xəbər verir ki, tədbirdə Dövlət Komitəsinin rəhbər şəxsləri, Şərqi Zəngəzur iqtisadi rayonuna daxil olan Laçın rayonunda Azərbaycan Prezidentinin xüsusi nümayəndəliyinin, Laçın Rayon İcra Hakimiyyətinin və Dövlət Komitəsi yanında İctimai Şuranın nümayəndələri iştirak ediblər.

Sus kəndində yeni inşa edilmiş fərdi evlər indiyədək müvəqqəti məskunlaşma yerlərində yaşayan və həmin kənddə daimi qeydiyyatda olan məcburi köçkünlərə verilir. Püşkatma 59 ailə arasında keçirilib. Ailə tərkibinə uyğun olaraq, onlardan 13-ü ikiotaqlı 28-i üçotaqlı, 14-ü dördotaqlı, 4-ü isə beşotaqlı fərdi evə köçürüləcək.

Püşkatmada iştirak etmiş ailələrin yaxın günlərdə Laçın rayonunun Sus kəndinə yola salınmasına başlanacaqdır.

Naxçıvan şəhərində bu il aprelin 29-30-da Azərbaycan Qeyri-Hökumət Təşkilatlarına Dövlət Dəstəyi Agentliyinin təşkilatçılığı ilə “QHT-lərin IV İnkişaf və Mübadilə Proqramı” keçiriləcək.

"Operativ Məlumat Mərkəzi-OMM" xəbər verir ki, proqramda Naxçıvan Muxtar Respublikasında fəaliyyət göstərən 50-yə yaxın QHT təmsilçisi iştirak edəcək.

2 gün ərzində davam edəcək təlimlərdə “Layihələrin məqsəd və vəzifələrinin müəyyən edilməsi”, “Layihə tərəfdaşlarının, hədəf qrupları və benefisiarlarının təyin edilməsi və onların gözləntiləri”, “Layihənin icra planının hazırlanması” və s. kimi mövzularda QHT-lərin bilik və bacarıqları artırılacaq, praktiki qrup işləri təşkil olunacaq.

Təlimləri layihələrin tərtibi üzrə beynəlxalq dərəcəli ekspert aparacaq. Təlimin yekununda uğurlu nəticə göstərən QHT-lərə Agentliyin sertifikatları təqdim olunacaq.

Xatırladaq ki, Qeyri-Hökumət Təşkilatlarına Dövlət Dəstəyi Agentliyi 2022-ci ildə Mingəçevirdə, 2023-cü ildə Naftalan və Bakı şəhərlərində QHT-lərin İnkişaf və Mübadilə Proqramlarını icra edib, bu proqramlarda indiyədək 300-dən çox QHT iştirak edib.

Azərbaycanda əlilliyin təyin edilməsi ilə bağlı hələ də müəyyən boşluq və problemlər var.

"Operativ Məlumat Mərkəzi-OMM" xəbər verir ki, bu fikirləri deputat Jalə Əliyeva parlamentin Əmək və sosial siyasət komitəsinin bugünkü iclasında çıxışı zamanı deyib.

Bu sahədə dövlətin apardığı siyasətlə böyük uğurların əldə edildiyini xatırladan deputat bildirib ki, hələ də bu məsələlərlə bağlı hər birimizə onlarla məktub daxil olur: “Təklif edirəm ki, bu qəbildən olan problemlər Ombudsman institutu tərəfindən nəzarətə götürülsün”.