ABŞ-də Rusiya ilə ikitərəfli münasibətlərin bərpası və gərginliyin azaldılması istiqamətində mümkün addımlar müzakirə olunur.
"Operativ Məlumat Mərkəzi-OMM" xəbər verir ki, bu barədə beynəlxalq münasibətlər üzrə amerikalı ekspert Lyuk Nikastronun "The American Conservative" nəşrində yayımlanan məqaləsində qeyd olunub.
Məlumata görə, Nikastro ABŞ-nin Rusiya ilə bağlı əsas strateji məqsədinin qarşıdurmanı artırmaq deyil, münaqişələrin qarşısını almaq və sabitliyi təmin etmək olmalı olduğunu bildirib.
Ekspert vurğulayıb ki, ABŞ-nin Milli Təhlükəsizlik Strategiyasında da əsas prioritetlərdən biri Ukraynadakı münaqişənin başa çatdırılması və "strateji sabitliyin" bərpası kimi göstərilir.
Nikastro ABŞ-nin Avropadakı hərbi mövcudluğunun Moskva ilə münasibətlərdə gərginlik yaradan amillərdən biri olduğunu qeyd edib. Onun fikrincə, bölgədəki hərbi fəaliyyət Rusiyada narahatlıq doğurur və tərəflər arasında etimadsızlığı artırır.
Bununla yanaşı, ABŞ-nin Avropadakı hərbi kontingentinin azaldılması məsələsi də gündəmə gəlib. Məlumata görə, Vaşinqton NATO çərçivəsində öhdəliklərini qorumaqla yanaşı, diqqətini Asiya-Sakit okean regionuna, xüsusilə Çinlə bağlı strateji məsələlərə yönəltməyi planlaşdırır.
Mayın 27-də ABŞ-nin Avropadakı hərbi qüvvələrinin sayının azaldılması ilə bağlı qərar verdiyi barədə məlumatlar yayılıb.
