“The 12-Day Battle and the Question of Iran's National Brand” adlı kitabın təqdimat mərasimində çıxış edən İran Xarici İşlər Nazirliyinin sözçüsü İsmayıl Bəqayi son illərdə ölkənin üzləşdiyi çətinliklərin cəmiyyətə İranın əsas problemləri ilə bağlı mövqeyini müəyyənləşdirmək üçün mühüm fürsət yaratdığını bildirib.
“Operativ Məlumat Mərkəzi – OMM” xəbər verir ki, Bəqayi onilliklər ərzində İrana qarşı aparılan mənfi təbliğatın qlobal ictimai rəydə reallıq kimi qəbul edilməsinə çalışıldığını vurğulayıb.
Bəqayi qeyd edib ki, İrana qarşı formalaşdırılan mənfi yanaşma yalnız ölkənin beynəlxalq imicinə zərər vurmaqla kifayətlənməyib, həm də İrana qarşı müxtəlif qərarların qəbul edilməsi üçün zəmin yaradıb.
Onun sözlərinə görə, İran beynəlxalq müstəvidə təhlükə kimi təqdim edilib, nüvə məsələsi isə qarşıdurmadan başqa çıxış yolunun olmadığı təsəvvürünü gücləndirmək üçün manipulyasiya olunub.
İran rəsmisi bu yanaşmanı “demonizasiya və insanlıqdan çıxarma” prosesi adlandıraraq, ölkənin müxtəlif stereotiplər vasitəsilə gözdən salındığını və ona qarşı atılan addımların qanuniləşdirilməsinə cəhd göstərildiyini bildirib.
Bəqayi son bir il yarım ərzində baş verən hadisələrin İranla bağlı bir sıra köhnəlmiş təsəvvürləri dağıtdığını deyib.
Onun sözlərinə görə, İranın idarəetmə strukturunun ayrı-ayrı şəxslərdən asılı olduğu və rəhbər şəxslərin dəyişməsi ilə ölkənin zəifləyəcəyi barədə iddialar özünü doğrultmayıb.
“İranın operativ reaksiyası və institutların davamlılığı göstərdi ki, bu ölkə şəxslərə deyil, qurumlara əsaslanır”, - deyə Bəqayi bildirib.
İran rəsmisi ABŞ-nin uzun müddət institutlara əsaslanan dövlət kimi təqdim edilməsinə baxmayaraq, bəzi hallarda ayrı-ayrı şəxslərin və qrupların güclü təsiri altında qaldığını da qeyd edib.
Bəqayi vurğulayıb ki, İranın müharibə şəraitində nümayiş etdirdiyi davranış ölkənin yalnız hərbi sahədə deyil, diplomatik və intellektual müstəvidə də potensiala malik olduğunu göstərib.
O əlavə edib ki, bu dövrdə əldə olunan təcrübə düzgün qiymətləndiriləcəyi təqdirdə, gələcək İranın daha güclü dövlət kimi formalaşmasına imkan verə bilər.
