OMM Redaksiyası
Murad Fətiyev Bakıda keçirilən dünya çempionatında bürünc medal uğrunda görüşə çıxacaq. Azərbaycan cüdoçusunun rəqibi Serbiya təmsilçisi Nemanya Maydovdur. Fətiyev iyunun 21-də Ulan-Batorda keçirilən Böyük Dəbilqə turnirində Maydova qalib gəlib, daha sonra Adam Kopeçkini məğlub edərək bürünc medal qazanıb.
27 yaşlı Fətiyev böyüklər arasında dünya çempionatında ilk medalını əldə etmək üçün mübarizə aparacaq. Onun aktivində Bakıdakı 2024-cü il və Daşkənddəki 2026-cı il Böyük Dəbilqə turnirlərinin qızıl medalları, eləcə də 2025-ci il Avropa çempionatının bürünc mükafatı var.
Maydov 2017-ci ildə dünya çempionu olub, 2019-cu ildə mundialın bürünc, 2024-cü ildə isə gümüş medalını qazanıb. Serbiyalı cüdoçu Bakıda 2019-cu il Böyük Dəbilqə turnirində qalib gəlib. O, 2022-ci ildə də şəhərdə keçirilən yarışın 1/4 finalında Məmmədəli Mehdiyevi 12 dəqiqə 5 saniyədən sonra ipponla məğlub edib.
Fətiyev yarımfinalda yaponiyalı Goki Təcimaya uduzub. Təcima ötən il Budapeştdə keçirilən dünya çempionatının yarımfinalında Elcan Hacıyevi də məğlub etmişdi; Hacıyev daha sonra bürünc medal qazanmışdı. Bakıda 90 kq çəki dərəcəsinin finalında isə Təcima həmyerlisi Sansiro Murao ilə qarşılaşacaq. Azərbaycan millisi turnirdə indiyədək dörd medal əldə edib: Əhməd Yusifov qızıl, Zelim Tsayev gümüş, Rəşid Məmmədəliyev və Ömər Rəcəbli isə bürünc medal qazanıblar.
