OMM Redaksiyası
Ermənistanın xarici işlər naziri Ararat Mirzoyan ABŞ-nin sülhməramlı missiyalar üzrə xüsusi elçisinin baş müşaviri Arye Laytstounla görüşüb, danışıqların mövzularından biri "Tramp marşrutu" (TRIPP) layihəsinin həyata keçirilməsi olub.
“Operativ Məlumat Mərkəzi-OMM” Ermənistan mediasına istinadən xəbər verir ki, bu barədə respublikanın Xarici İşlər Nazirliyi məlumat yayıb.
Tərəflər 2025-ci il avqustun 8-də keçirilmiş Vaşinqton sülh sammitindən sonra Cənubi Qafqazda sülh prosesində əldə edilmiş əhəmiyyətli irəliləyişi qeyd ediblər. Onlar regionun potensialının tam üzə çıxarılması üçün Bakı və İrəvan arasında sülhün vacibliyini vurğulayıblar.
Mirzoyan və Laytstoun həmçinin ticari-iqtisadi əməkdaşlığın perspektivlərini, Ermənistanın iqtisadi və enerji dayanıqlığının gücləndirilməsi məsələlərini müzakirə ediblər.
"Regional əməkdaşlığın inkişafına və mövcud rəqabət üstünlüklərindən istifadəyə xüsusi diqqət yetirilib. Bu kontekstdə tərəflər TRIPP proqramının icrasının gedişini nəzərdən keçirib və onun ən qısa zamanda reallaşmasında qarşılıqlı maraqlı olduqlarını təsdiqləyiblər. Bundan başqa, Ermənistanın beynəlxalq nəqliyyat-infrastruktur sisteminə inteqrasiyasının ən səmərəli yolları barədə fikir mübadiləsi aparılıb", - məlumatda vurğulanır.
