Ermənistanın xarici işlər naziri Ararat Mirzoyan bəyan edib ki, ABŞ ilə ikitərəfli formatda planlaşdırılan qlobal TRIPP ("Trampın Marşrutu") layihəsinin tikinti və idarəetmə mərhələsində İrəvana üçüncü tərəfdaş ölkələrin köməyi lazım olacaq.
“Operativ Məlumat Mərkəzi-OMM” agentliyinin məlumatına görə, nazir bu strateji bəyanatı Estoniya XİN başçısı Marqus Sahkna ilə birgə keçirilən mətbuat konfransında səsləndirib.
"Biz ümid edirik ki, mümkün qədər tez növbəti mərhələyə - tikintiyə keçəcəyik və məhz burada bizə üçüncü tərəfdaşlar lazım olacaq", - deyə Ararat Mirzoyan vurğulayıb. O qeyd edib ki, müqavilə Ermənistan və ABŞ arasında olsa da, sistemlərin idarə olunması prosesində xarici dəstəyə ehtiyac duyulacaq. Hazırda layihə üzərində iş intensiv rejimdə davam edir və hökumətlərarası sazişin razılaşdırılması mərhələsindədir.
TRIPP layihəsi qlobal miqyası ilə diqqət çəkir və Çindən başlayaraq Portuqaliyaya qədər bir çox ölkələrin maraqlarını əhatə edir. Nazirin sözlərinə görə, marşrutun bir ucu Azərbaycanla, digəri isə Naxçıvanla həmsərhəd olmalıdır. Layihənin məntiqi davamı isə Ermənistanın Türkiyəyə və Mərkəzi Asiya ölkələrinə çıxan dəmir yolu şəbəkəsidir. Həmçinin, bu qlobal təşəbbüsə Yaxın Şərq dövlətlərinin də xüsusi maraq göstərdiyi bildirilir.
