"Bakı Metropoliteni" QSC fevralın 18-də baş tutacaq UEFA Çempionlar Liqası matçı ilə əlaqədar mühüm qərar qəbul edib. "Qarabağ" və İngiltərənin "Nyukasl Yunayted" klubları arasında keçiriləcək qarşılaşma səbəbindən metronun iş vaxtı 1 saat uzadılacaq.
Bu barədə "Operativ Məlumat Mərkəzi-OMM"-ə səhmdar cəmiyyətindən rəsmi məlumat verilib.
Metro stansiyaları saat neçəyə qədər açıq olacaq?
Azərbaycan Futbol Federasiyaları Assosiasiyasının (AFFA) müraciəti və paytaxtdakı kütləvi tədbirlər planına əsasən, fevralın 18-dən 19-na keçən gecə metropolitenin bütün stansiyaları sərnişinlər üçün saat 01:00-a qədər girişə açıq olacaq.
"Gənclik" və digər stansiyalarda hansı tədbirlər görüləcək?
Tofiq Bəhramov adına Respublika stadionunun yaxınlığında yerləşən "Gənclik" stansiyasında xüsusi tədbirlər planı həyata keçiriləcək. Stansiyada gücləndirilmiş iş rejimi tətbiq olunmaqla yanaşı, xidmət üçün əlavə işçi qüvvəsi ayrılacaq.
Sərnişin sıxlığını tənzimləmək məqsədilə, zərurət yaranarsa, xəttə buraxılmaq üçün ehtiyat qatarlar hazır vəziyyətdə saxlanılacaq. Qatarların hərəkəti üçün xüsusi qrafik müəyyən edilsə də, ümumilikdə payız-qış hərəkət cədvəli qüvvədə qalacaq.
Bundan əlavə, sərnişinlərin rahatlığı və təhlükəsizliyi üçün "Nərimanov" və "28 May" stansiyalarında da nəzarət mexanizmləri gücləndiriləcək.
