OMM Redaksiyası
“Mançester Yunayted”in baş məşqçisi Maykl Kerrik Çempionlar Liqasının ümumi mərhələsinin ikinci turunda “Atletiko Madrid”ə 0:2 hesabı ilə uduzduqları oyunu dəyərləndirib. Qarşılaşma oktyabrın 13-də Madriddə keçirilib.
“Atletiko Madrid”in qollarını 1-ci dəqiqədə Barrios, 79-cu dəqiqədə isə Lukun vurub. “Mançester Yunayted”in futbolçusu Yoro 74-cü dəqiqədə meydandan qovulub.
Kerrik BBC-yə açıqlamasında komandanın oyuna inamla başladığını, lakin əvvəlki matçlar və müxtəlif amillər səbəbindən nəzarəti tez itirməyin asan olduğunu deyib. Onun sözlərinə görə, futbolçuların reaksiyası kollektivdə inamın, komanda ruhunun və birliyin olduğunu göstərib. Kerrik oyunçuların yaranmış vəziyyətdən çıxış yolunu özlərinin tapmalı olduğunu, bunun öhdəsindən kifayət qədər yaxşı gəldiklərini bildirib.
“Məğlub olduq və nəticəyə görə məyusuq, amma belə çətinlikləri müxtəlif yollarla keçmək mümkündür. Ümumilikdə bunun öhdəsindən layiqincə gəldik. Bu, özümüzə inamımızı möhkəmləndirdi və bizi daha güclü etdi”, – Kerrik qeyd edib.
Baş məşqçi bu cür sınaqların kollektivin birliyini artıra biləcəyini, bunun cari həftə ərzində komandada baş verdiyini söyləyib. O, futbolçuların hazırda psixoloji baxımdan çox yaxşı vəziyyətdə olduqlarını əlavə edib. “Mançester Yunayted” iki turdan sonra 3 xalla turnir cədvəlinin 13-cü pilləsində qərarlaşıb.
