Makronun səfərində Ermənistan və Fransa Strateji Tərəfdaşlıq sənədi imzalayacaq

Fransa Prezidenti Emmanuel Makronun mayın 5-də İrəvana nəzərdə tutulan dövlət səfəri zamanı Ermənistan və Fransa arasında Strateji Tərəfdaşlıq haqqında sənəd imzalanacaq.

"Operativ Məlumat Mərkəzi-OMM" xəbər verir ki, bu barədə Ermənistan xarici işlər nazirinin müavini Vahan Kostanyan yerli televiziyaya müsahibəsində bildirib.

Nazir müavini qeyd edib ki, iki ölkə arasında münasibətlərin inkişafına dair geniş gündəlik mövcuddur:

"Ən vacib məsələ uzun müddətdir müzakirə olunan Strateji Tərəfdaşlıq sənədidir. Nəhayət, bu sənəd səfər çərçivəsində imzalanacaq".

Onun sözlərinə görə, səfər zamanı həmçinin müxtəlif sahələr üzrə əməkdaşlığı nəzərdə tutan bir sıra digər sənədlərin də imzalanması gözlənilir.