Fransanın "Patriotlar" partiyasının rəhbəri Florian Filippo ölkə prezidenti Emmanuel Makronun ABŞ rəhbərliyindən bəzi Avropa rəsmilərinə qarşı sanksiyaların ləğvini istəməsinə sərt reaksiya verib.
"Operativ Məlumat Mərkəzi-OMM" xəbər verir ki, Filippo "X" sosial şəbəkəsində paylaşım edərək, Makronun bu addımını rüsvayçılıq kimi xarakterizə edib.
"Tribune" qəzetinin məlumatına görə, Emmanuel Makron Donald Trampa məktub yazaraq, Avropa İttifaqının daxili bazar üzrə keçmiş komissarı Tyerri Breton və Beynəlxalq Cinayət Məhkəməsinin hakimi Nikolya Qiyu da daxil olmaqla, bir neçə avropalıya qarşı tətbiq edilən məhdudiyyətlərin aradan qaldırılmasını xahiş edib.
Fransa lideri məktubunda bu sanksiyaların "ədalətsiz" olduğunu və "səhv təhlilə" əsaslandığını qeyd edib.
Florian Filippo isə bu müraciəti belə şərh edib:
"Rüsvayçılıq! Bu, dəyərlərin tamamilə alt-üst edilməsidir və bu hal 'makronizm'in əsas fərqləndirici xüsusiyyətidir!"
Qeyd edək ki, ötən ilin sonunda ABŞ-nin dövlət katibi Marko Rubio Tyerri Bretonun ABŞ platformalarına senzura tətbiq etmək cəhdlərinə görə ölkəyə girişinə qadağa qoyulduğunu açıqlamışdı.
Breton "Aİ Rəqəmsal Xidmətlər Aktı"nın əsas müəlliflərindən biri hesab olunur. O, milyarder İlon Maskın Donald Trampla onlayn müsahibəsi ərəfəsində həmin qanuna istinad edərək "X" platformasını və Maskı hədələyən məktub dərc etmişdi.
