Lukaşenko Putin və Tramp barədə: "Mən imperator deyiləm"

Belarus Prezidenti Aleksandr Lukaşenko Rusiya və ABŞ liderləri barədə diqqətçəkən açıqlamalar verib.

“Operativ Məlumat Mərkəzi-OMM” xəbər verir ki, Belarus lideri RT jurnalisti Rik Sançezə müsahibəsində Vladimir Putin və Donald Tramp haqqında fikirlərini bölüşüb.

O bildirib ki, “bilirsiniz, mən Donald Tramp və ya Vladimir Putin kimi imperator deyiləm. Onlar sevilməkdən danışa bilərlər. Onlar əla insanlardır, imperatorlar”.

Aleksandr Lukaşenko özünü “orta səviyyəli ölkənin” lideri adlandıraraq, Putin və Tramp qədər imkanlarının olmadığını qeyd edib.

Belarus Prezidenti əlavə edib ki, “ümumi sevgiyə qarşı bu sakit münasibət, xüsusilə uzun illər prezidentlikdən sonra buradan qaynaqlanır”.

Müsahibə zamanı Lukaşenko Putini sadəcə dostdan daha artıq gördüyünü vurğulayıb. Onun sözlərinə görə, o, rusiyalı həmkarına qardaş kimi yanaşır və eyni münasibəti qarşı tərəfdən də hiss edir.

Bundan əlavə, Lukaşenko ABŞ-yə yalnız Trampın əlini sıxmaq üçün səfər etmək istədiyi barədə yayılan iddiaları təkzib edib. O qeyd edib ki, Amerika lideri ilə görüşməkdən məmnun olardı, lakin bunun əsas məqsəd olmadığını bildirib.