İsveç Gripen qırıcı təyyarələrini yalnız Rusiya ilə sülh razılaşması əldə edildiyi təqdirdə Ukraynaya təhvil verəcək.
“Operativ Məlumat Mərkəzi-OMM” “Reuters”ə istinadən xəbər verir ki, Baş nazir Ulf Kristersson bunu “könüllülər koalisiyası”nın iclasından sonra sosial media səhifəsində açıqlayıb.
O, Stokholmun Qripen qırıcı təyyarələri, Qara dənizin minalardan təmizlənməsi üçün lazım olan resursları təmin etməklə və Ukrayna Silahlı Qüvvələrinin zabitlərini təlimləndirməklə “Ukraynada sülhün qorunmasına” töhfə verməyə hazır olduğunu bildirib.
Kristersson çatdırılma üçün ilkin şərtin çoxmillətli qüvvələr üçün aydın döyüş qaydaları və İsveç parlamentinin rəsmi təsdiqi olduğunu vurğulayıb.
Daha əvvəl Fransa Prezidenti Emmanuel Makron da Ukraynada atəşkəsdən sonra sülhü qorumaq məqsədilə “minlərlə fransız əsgəri”nin oraya yerləşdirilə biləcəyini açıqlamış, lakin bunun döyüş əməliyyatlarında iştirak edəcək qüvvələrə aid olmadığını qeyd etmişdi.
