Afət Ziyadqızı
Birləşmiş Millətlər Təşkilatı (BMT) İsrailin işğal olunmuş Fələstin ərazilərində məskunlaşma fəaliyyətlərini beynəlxalq hüququn pozuntusu kimi qiymətləndirdiyini bir daha bəyan edib.
“Operativ Məlumat Mərkəzi-OMM” xəbər verir ki, bu barədə BMT Baş katibinin sözçüsünün müavini Fərhan Haq Nyu-Yorkda keçirdiyi brifinqdə məlumat verib.
Bildirilib ki, Fərhan Haq BMT-nin bu məsələdə mövqeyinin dəyişməz qaldığını vurğulayaraq, İsrailin işğal olunmuş ərazilərdə məskunlaşma məntəqələrinin genişləndirilməsi və yeni tikinti layihələrinin beynəlxalq hüququn açıq şəkildə pozulması olduğunu qeyd edib.
Qeyd olunub ki, BMT rəsmisinin sözlərinə görə, bu cür fəaliyyətlər regionda sülh prosesinə mane olur, gərginliyi artırır və iki dövlətli həll perspektivini daha da çətinləşdirir.
