İsrail döyüş təyyarələri Livanın cənubundakı bir neçə bölgəyə silsilə hava zərbələri endirib.
"Operativ Məlumat Mərkəzi-OMM" xəbər verir ki, bu barədə Livan mediası məlumat yayıb.
Məlumata görə, axşam saatlarında üç dalğa şəklində həyata keçirilən 14 hava hücumundan 10-u Meydun və Cabur yüksəkliklərinə, ikisi Vadi-Borquz rayonuna, digər ikisi isə Reyhan və Luveyze yüksəklikləri arasındakı Kasarat əl-Aruş ərazisinə düşüb.
Gecə saatlarında isə İqlim ət-Tuffah bölgəsindəki Akmata-Luveyze yüksəklikləri hədəf alınıb.
Livan rəsmiləri İsrailin atəşkəs razılaşmasına baxmayaraq, ölkənin suverenliyini sistematik şəkildə pozmağa davam etdiyini bildirir.
Hazırda İsrail silahlı qüvvələri Livanın cənubundakı beş strateji nöqtədə, o cümlədən Qacar kəndinin şimal hissəsində mövcudluğunu qoruyur. Beyrut bunu BMT Təhlükəsizlik Şurasının 1701 saylı qətnaməsinin pozulması və işğalın davamı kimi qiymətləndirir.
Livan Daxili İşlər Nazirliyinin statistikasına əsasən, 2025-ci ilin əvvəlindən bəri İsrail respublika ərazisinə 4500-dən çox hücum reallaşdırıb.
İsrail ordusu isə öz növbəsində bəyan edir ki, zərbələr "Hizbullah" hərəkatının hərbi infrastrukturunu sıradan çıxarmaq və qruplaşmanın rəhbər heyətini zərərsizləşdirmək məqsədi daşıyır.
