Afət Ziyadqızı
İspaniya Senatı Fransa ilə dostluq sazişini rədd edib. Sənədin əleyhinə sağçı Xalq Partiyası və ifrat sağçı “Vox” partiyasından 142 senator, lehinə isə Baş nazir Pedro Sançesin Sosialist Partiyasından 106 senator səs verib.
“Operativ Məlumat Mərkəzi-OMM” xəbər verir ki, səsvermə Kral Sarayında Fransa Prezidenti Emmanuel Makron, Kral VI Felipe və Kraliça Letisiyanın iştirakı ilə rəsmi şam yeməyinin başladığı vaxt keçirilib.
Səsvermə Senat binasından bir neçə yüz metr məsafədə yerləşən Kral Sarayında keçirilən ziyafət zamanı baş tutub.
Fransa ilə İspaniya arasındakı dostluq sazişi ilk dəfə 2023-cü ilin yanvarında Barselonada Emmanuel Makron və Pedro Sançes tərəfindən imzalanıb. Daha sonra sənəd Madridin Deputatlar Konqresi, eləcə də Parisdəki Fransa Milli Assambleyası və Senat tərəfindən təsdiqlənib.
Senatda mütləq çoxluğa malik İspaniya Xalq Partiyası sazişin müddəalarından birinə qarşı çıxıb. Həmin müddəa iki ölkədən birinin hökumət üzvünün ən azı üç ayda bir dəfə digər ölkənin Nazirlər Şurasının iclasına dəvət olunmasını nəzərdə tutur.
İspaniya məhkəməsi Makronun Madridə səfərindən bir neçə gün əvvəl, sentyabrın 23-də Fransa-İspaniya dostluq sazişinin konstitusiyaya uyğun olduğuna qərar verib.
Fransa İspaniyadan başqa Avropada Almaniya, İtaliya və Polşa ilə də bu tip dostluq sazişləri imzalayıb. İspaniya isə qonşuları olan Portuqaliya və Mərakeşlə oxşar anlaşmalar bağlayıb.
