İran İslam Respublikası Parlamentinin Milli Təhlükəsizlik və Xarici Siyasət Komissiyasının sədri İbrahim Əzizi ABŞ-nin regiondakı roluna dair açıqlama verib.
"Operativ Məlumat Mərkəzi-OMM" xəbər verir ki, Əzizi bildirib ki, Vaşinqtonun regional proseslərə müdaxilə etdiyi dövr artıq geridə qalıb və “məğlubiyyətlə üzləşən tərəflərin” bölgəyə qayıtmaq cəhdləri nəticə verməyəcək.
Strateji əhəmiyyətə malik Hürmüz boğazına toxunan komissiya sədri bu ərazini İranın dövlət suverenliyinin ayrılmaz hissəsi kimi xarakterizə edib. Onun sözlərinə görə, boğazın idarə olunması tam şəkildə İran İslam Respublikasının nəzarətində olmalıdır.
İbrahim Əzizi Livanın təhlükəsizlik məsələsinə də münasibət bildirib. O qeyd edib ki, ölkənin sabitliyi müqavimət qüvvələrinin tərksilahı ilə deyil, İsrailin işğal və təcavüz siyasətinə son qoyulması ilə təmin oluna bilər.
O, əvvəlki açıqlamalarına da istinad edərək bildirib ki, ABŞ-nin regional ssenarilərinə güvənmək Yaxın Şərq ölkələrinin sabitliyinə zərər vurur və ABŞ hərbi bazalarının bir çox hallarda müdafiədən daha çox təhlükə mənbəyinə çevrildiyini iddia edib.
