İran rəsmiləri ABŞ Prezidenti Donald Trampın Hörmüz boğazına nəzarətin ABŞ-nin əlində olduğu barədə açıqlamalarına sərt reaksiya veriblər.
“Operativ Məlumat Mərkəzi – OMM” xəbər verir ki, Tramp avqustun 12-də ABŞ-nin Hörmüz boğazına “tam nəzarət” etdiyini açıqlamışdı. İran tərəfi isə bu iddiaları reallıqdan uzaq və əsassız hesab edir.
İranlı deputatlardan biri Trampın açıqlamalarını tənqid edərək, ABŞ Prezidentinə öz təhlükəsizliyi barədə düşünməyi tövsiyə edib. İran rəsmisi Trampın Hörmüzlə bağlı təhdidlərini “boş və qarşıdurma xarakterli” ritorika kimi qiymətləndirib.
Məsələ Trampın Türkiyədən Böyük Britaniyaya səfəri zamanı həyata keçirildiyi bildirilən gizli uçuşla bağlı məlumatların yayılmasından sonra daha da diqqət çəkib.
Məlumata görə, 2026-cı ilin iyulunda NATO sammiti zamanı Tramp Ankaradan ayrılarkən “Air Force One”dan gizli şəkildə daha kiçik C-32A hərbi təyyarəsinə keçirilib. “Air Force One” isə diqqəti yayındırmaq məqsədilə marşrut üzrə hərəkətini davam etdirib. Tramp sonradan təyyarə dəyişikliyinin təhlükəsizlik səbəbilə həyata keçirildiyini təsdiqləyib.
ABŞ mediasında bu addımın İran tərəfindən mümkün raket və ya sui-qəsd təhdidi ilə əlaqədar olduğu bildirilib. Bununla belə, sonrakı məlumatlarda həmin təhdidin mənbəyi və etibarlılığı ilə bağlı müxtəlif iddialar səsləndirilib.
İran tərəfi isə Trampın Hörmüz boğazı ilə bağlı sərt bəyanatlarını onun öz təhlükəsizlik narahatlıqları ilə ziddiyyət təşkil edən mövqe kimi təqdim edir.
Hörmüz boğazının statusu ilə bağlı qarşıdurma davam edir. Tehran su yolunun ABŞ-nin tələbləri yerinə yetirilənədək bağlı qalacağını bildirir, Vaşinqton isə boğazın təhlükəsiz və açıq olduğunu iddia edir.
