İran ABŞ və İsrailin hərbi fəaliyyətlərinə dəstək verən ölkələri beynəlxalq hüququ pozmaqda ittiham edib.
“Operativ Məlumat Mərkəzi – OMM” xəbər verir ki, İran Xarici İşlər Nazirliyinin sözçüsü İsmayıl Bəqayi həftəlik mətbuat konfransında regional gərginlik və beynəlxalq münasibətlərlə bağlı geniş açıqlamalar verib.
Bəqayi Bolqarıstanın ABŞ və İsrailin İrana qarşı hərbi fəaliyyətlərinə dəstək verməsini sərt tənqid edib. O, ABŞ-yə məxsus “KC-135” yanacaqdolduran təyyarələrin Bolqarıstan ərazisindən istifadə etməsi ilə bağlı xəbərlərə toxunaraq, bunun ABŞ və İsrailin İrana qarşı hərbi təcavüzünə dəstək kimi qiymətləndirildiyini bildirib.
İran rəsmisi vurğulayıb ki, ölkələr öz ərazilərini və hərbi bazalarını təcavüzkar tərəflərin istifadəsinə verdikdə vəziyyət fərqlənir. Bəqayi İranın öz varlığını və ərazi bütövlüyünü qorumaq üçün istənilən təcavüzkar hərəkətin mənbəyini hədəf almaq hüququna malik olduğunu bildirib.
ABŞ-nin İrana qarşı tətbiq etdiyi iqtisadi sanksiyaları “iqtisadi terrorizm” adlandıran Bəqayi bu tədbirlərin İran xalqını cəzalandırmağa yönəldiyini deyib. O, həmçinin dəniz blokadasının təcavüzkar hərəkət olduğunu və Vaşinqtonun digər ölkələri İranla ticarəti dayandırmağa məcbur etməsinin beynəlxalq hüquqa zidd olduğunu vurğulayıb.
Hürmüz boğazından keçən neftin həcmi ilə bağlı ABŞ rəsmilərinin açıqlamalarını da rədd edən Bəqayi bu rəqəmlərin psixoloji müharibənin bir hissəsi olduğunu bildirib.
İran rəsmisi Tehran və Oman arasında Hörmüz boğazının təhlükəsizliyi ilə bağlı danışıqların aparılacağını açıqlayıb. O, dəniz yollarının təhlükəsizliyinin təmin edilməsinin vacibliyini vurğulayıb.
Bəqayi İsrailin Suriyaya qarşı hücumlarını da tənqid edərək, bunu “Böyük İsrail” layihəsinin bir hissəsi kimi qiymətləndirib. Onun sözlərinə görə, Suriyanın özünü müdafiə etmək hüququ var və bu cür hücumlar beynəlxalq hüququn kobud şəkildə pozulmasıdır.
