Afət Ziyadqızı
İranla əlaqəli hakerlərin Böyük Britaniyada enerji obyektini sıradan çıxardığı açıqlanıb.
“Operativ Məlumat Mərkəzi – OMM” xəbər verir ki, ötən ay baş verən insident İranla əlaqəli qrupların ölkədə enerji obyektinə uğurlu kiberhücum etdiyi ilk hadisə kimi qeydə alınıb.
Adı açıqlanmayan obyektin kiçik miqyaslı olduğu və hücumun Böyük Britaniyanın ümumi elektrik şəbəkəsinə təsir etmədiyi bildirilib.
Hadisədən sonra hökumət enerji şirkətlərinə təhlükəsizliklə bağlı tövsiyələr göndərib və məsələ Milli Kiber Təhlükəsizlik Mərkəzinə (NCSC) çatdırılıb.
NCSC rəhbəri Riçard Horn daha əvvəl Çin, İran və Rusiya tərəfindən həyata keçirilən kiberhücum cəhdlərinin artdığını açıqlamışdı.
Böyük Britaniya hökuməti mümkün təhdidlərin qarşısını almaq üçün süni intellekt əsaslı milli kiber-qalxan hazırlayır. Sistemin beş il ərzində tam fəaliyyətə başlaması planlaşdırılır.
